Policia e Kosovës ka bërë të ditur se alarmi për një mjet shpërthyes në Stacionin e Autobusëve në Prishtinë, ka rezultuar i rrejshëm.
Zëdhënësi i Policisë së Kosovës për Rajonin e Prishtinës, Agron Borovci, për teve1.info ka bërë të ditur se në vendin e ngjarjes kanë dalë njësia policore, duke ftuar edhe aktorët tjerë relevantë.
Borovci, ka thënë se është bërë evakuimi i personelit dhe personave të tjerë prezent në perimetrin përreth.
“Policia menjëherë ka dalë në vendin e ngjarjes duke ftuar edhe akterët e tjerë relevant dhe ka nisur ndërmarrjen e veprimeve të nevojshme për të menaxhuar me situatën, përfshirë këtu edhe evakuimin e personelit dhe personave të tjerë prezent në perimetrin përreth. Pas ndërmarrjes së të gjitha veprimeve të nevojshme operative si dhe kontrollit të detajuar të hapësirës së caktuar nga ana e njësive të specializuara për menaxhimin me mjetet shpërthyese, informata ka rezultuar të jetë e rrejshme”, tha Borovci.
