Katër ish drejtuesit e lartë të Ushtrisë Çlirimtare të Kosovës po mbahen në paraburgim qe një vit e gjysmë.
E aktakuzat ndaj ish krerëve të UÇK-së pritet të shtohen.
Prokuroria e Specializuar në Hagë e kryesuar nga Jack Smith ka rënduar aktakuzat ndaj Hashim Thaçit, Kadri Veselit, Rexhep Selimit e Jakup Krasniqit, e të njëjtat ky organ i ka deponuar në Gjykatën Speciale.
Pretendimet e reja flasin për krime të kryera në fshatrat Budakovë dhe Semtishtë të Komunës së Suharekës dhe në qytetin e Gjilanit, në një konvikt atje.
Këto akuza tjera shfaqen në një dokument prej 30 faqesh.
Aktakuza e plotësuar u dorëzua me datën 29 prill derisa e njëjta u publikua të martën në uebfaqen e Dhomave të Specializuara.
Në këto anekse pjesa më e madhe e detajeve janë te redaktuara. E në pjesët tjera që janë publikuar përmenden rrëfime të që pretendojnë për krime të kryera nga ish krerët e UÇK-së.
“Anëtarët e UÇK-së ua hoqën lirinë së paku 12 personave pa një proces të rregullt, duke i mbajtur të arrestuar në lokacione si Budakovë e Semetishtë, në periudha të ndryshme ndërmjet 4 korrikut 1998 dhe 29 prillit 1999. Më 4 korrik, një person (I REDAKTUAR) po ngiste mbi një kamionetë, kur tre burra u ndaluan nga (I REDAKTUAR) dhe ( I REDAKTUAR), të cilët kishin veshur uniforma të zeza dhe mbanin pushkë automatike. Një person i tretë me uniformë mbërriti dhe qëndroi përballë me një raketahedhëse. I futën në bagazhin e automjetit dhe i dërguan në një shtëpi në Budakovë. Të tre burrat u vendosën në një bodrum dhe pastaj u rrahën”, thuhet në aktakuzë.
Tutje prokuroria e Hagës në akuzat e shtuara pretendon që ish-pjesëtarët e UÇK-së iu shkaktuan vuajtje e lëndime të rënda mendore 3 burrave me 4 korrik të vitit 1998.
“Pas arrestimit tre burrat i dërguan në një shtëpi në Budakovë, dhe i rrahën për një orë. Tre burrat konsideroheshin se ishin bashkëpunëtorë të Serbisë, dhe u torturuan edhe me ujë të nxehtë. Të tre njerëzve i thane se po i marrin për ti (REDAKTUAR). (REDAKTUAR) nënkuptuan që do të vriten. (REDAKTUAR) i thanë (REDAKTUAR) ata konsideroheshin që kanë punuar me policinë e serbe konsideroheshin tradhtare dhe (REDAKTUAR) se ishin torturuar..”, thuhet më tej aktakuzë.
Më tej në akuzat e reja të deponuara rishtazi pretendohet që ish pjesëtarët e UÇK-së kanë kryer vrasje.
“Kufomat e të arrestuarve u gjetën rreth datës 23 gusht 1998, me gjurmët e armëve që i përkiste personit (I REDAKTUAR). Analiza e ADN-së konfirmoi se njëra nga kufomat e varrosura ishte e (REDAKTUAR). Mënyra e qëllimshme në të cilën autorët e UÇK-së i trajtuan të burgosurit, demonstroi qëllimin e tyre për t’i vrarë, ose për t’iu shkaktuar lëndime me dashje”, thuhet aty.
Ndërsa në pikat tjera të aktakuzës së përmenden edhe një lokacion tjetër. Një konvikt në komunën e Gjilanit.
“Dy persona, (I REDAKTUAR) dhe (I REDAKTUAR), u rrëmbyen në Gjilan me dy ditë diferencë, dhe u shoqëruan në drejtim të konviktit, dhe nuk u pa kurrë më. Trupi i tij u gjet më 2 qershor 2000. Vetëm dy ditë më vonë, një tjetër person, u arrestua dhe u dërgua në konvikt dhe nuk u pa më kurrë. Trupi i tij u gjet në vitin 2022. (I REDAKTUAR) dhe (I REDAKTUAR) i cili u mor nga shtëpia e tij së bashku me finjin. Përderisa gratë u liruan sapo arritën afër konviktit, trupi i (REDAKTUAR) nuk u pa më përderisa trupi i tij u gjet në qershor 2022. Shqiptarët i thanë gruas ‘ti çetnike, shko te Millosheviqi’”, thuhet ndër të tjera në aktakuzë.
Për akuzat e reja të paraqitura në aktakuzë nga prokuroria e Hagës, Thaçi, Veseli, Krasniqi e Selimi do të deklarohen në katër seanca veç e veç me datën 10 maj.
