Nga salla plenarë për të 11-tën herë të zgjedhurit e popullit dolën pa u konstituuar Kuvendi i Kosovës.
Përgjegjësinë për dështim disa javor, kryetari i Partisë Demokratike të Kosovës, Memli Krasniqi e hodhi tek kryeministri në detyrë, Albin Kurti.
Krasniqi tha që Albulena Haxhiu po përdoret nga Kurti për interesa politike.
“Për Albin Kurtin siç duket është më e rëndësishme Albulena Haxhiu se sa rreth 1 milion qytetarë që kanë votuar në zgjedhjet e 9-shkurtit dhe që kanë dhënë verdiktin e tyre se si duhet të krijohen institucionet. Por në mungesë të besimit, në mungesë të numrave në mungesë të shumicës për tu bërë vet kryeministër Albin Kurti, ai po luan me Albulena Haxhiun duke e mbajtur atë si kandidaten e cila nuk ka kaluar, nuk kaloi e as nuk do të kaloi në të ardhmën”, tha Krasniqi.
Ndryshe nga dhjetë seancat e kaluara, kësaj radhe në holl nuk u deklarua askush nga Lidhja Demokratike e Kosovës.
Por ai që doli sërish para mediave ishte deputeti i Vetëvendosjes, Hekuran Murati.
Ai akuzoi partitë opozitare që nuk po konstituohet institucioni legjislativ.
“E pat që vullneti i deputetit po vazhdon të ndrydhet përmes insistimit në votim të hapur, ne kemi kërkua që të gjejmë një rrugëzgjidhje nga kjo pra, votimi i fshehtë është një mënyrë Kushtetuese se si dilet nga situata por po e shohim që partitë opozitare vazhdojnë të mos u besojnë deputetëve të tyre. Ftojmë edhe njëherë gjithë deputetët që ta mbështesin këtë proces të zhbllokohet procedura dhe të vazhdojmë tutje me konstituimin e Kuvendit”, tha Murati.
Zhbllokim të situatës kërkoi edhe kryetari i Nismës Socialdemokrate, Fatmir Limaj.
Veçse ai tha që i takon tri partive të mëdha të gjejnë një zgjidhje.
“Deri më tani sic e keni parë ju edhe ne, nuk po shohim ndonjë hap drejtë shumicës të konsoliduar. Po shpresoj që ky apel por edhe ata janë të vetëdijshëm sa më shpejtë të gjendet një zgjidhje tani më jemi në një fazë ku, raporti i forcave është matur tashmë dihet se si janë forcat në parlament, koha është për të ecur”, tha Limaj.
Tentativa e dymbëdhjetë për konstituimin e Kuvendit, është thirrur për të mërkurën me 7 maj.
