Me akuza e kundërakuza ndaj njëra tjetrës, tash e një kohë po përplasen ndërmarrja “Pastrimi” dhe Komuna e Prishtinës.
E krahas kësaj, kjo ndërmarrje ka edhe probleme financiare.
Kësisoj, në rrezik janë edhe pagat e punëtorëve.
Kjo sipas kryetarit të Komunës, Përparim Rama po ndodh për shkak të keqmenaxhimit e papërgjegjësisë.
“Sot rrezikohen pagat e punëtorëve, deponia mund të mbyllet dhe qyteti po e ndjen çdo ditë pasojën e këtij keqmenaxhimi. Punëtorët nuk kanë faj, faj kanë ata që kanë marrë paga të majme menaxheriale por s’kanë ditur e as nuk kanë dasht me udhëheq drejt ndërmarrjen”, tha kryetari i Prishtinës.
Por nga ndërmarrja “Pastrimi” fajtor po lënë Komunën.
Sipas kryeshefit ekzekutiv të kësaj ndërmarrjeje, Petrit Reçica, krejt kjo mund të tejkalohet nëse komuna ua paguan borxhin prej 2.7 milion euro.
“Realisht po në situatën ekzistuese na është paraqit kjo telashe, pagat janë ekzekutuar për pjesën më të madhe të stafit operativ të cilët kryejnë punë dhe shërbimin në kryeqytet. Problemet janë evidente ne kemi fol për këtë pjesë shumë moti. Por, e kemi njoftuar edhe Komunën që për shkak të mos pagesës 2.7 milion euro borxhe që i keni ndaj nesh ne po rrezikohemi me pamundësuar operimin”, tha Reçica.
Për gjendjen e krijuar, nga opozita në komunën e Prishtinës, po akuzojnë të dyja palët.
“Fajtor për këtë çështje janë dy palët, në pikë të parë menaxhmenti i ndërmarrjes “ Pastrimi” që ka dështuar në menaxhimin e ndërmarrjes me veprimet e tyre, me punësimet e panevojshme dhe të panumërta i kanë rritur këstet e shpenzimeve të ndërmarrjes. Në anën tjetër Komuna e Prishtinës me veprimet e tyre duke sabotuar ndërmarrjen duke bërë thirrje që faturat të mos paguhen në “ Pastrim”, por në Komunë ka ndikuar që të jetë një gjendje e rëndë thuajse është pranë bojkotimit “ Pastrimi”, tha asamblisti Vetëvendosje, Gëzim Sveçla.
Kryetari Rama kishte paralajmëruar se në seancën e kësaj jave, në Kuvendin Komunal do të kërkojë ndihmë emergjente financiare për siç ka thënë ai, mbrojtur punëtorët, mirëpo e njëjta ka dështuar.
Kjo pasi asamblistët e pushtetit lëshuan sallën të martën, pasi në mbledhjen e Komitetit për Politikë dhe Financa (KPF), u ndryshua rendi i ditës. Bashkë me asamblistët e pushtetit, që kryesisht vijnë nga LDK-ja, sallën e kishte lëshuar edhe kryetari Rama.
