Disa aktivistë ndërkombëtarë të deportuar nga Izraeli pasi iu bashkuan një flotilje ndihmash për Gazën kanë akuzuar forcat izraelite për keqtrajtim të aktivistes klimatike Greta Thunberg.
137 të dëbuarit zbarkuan në Stamboll të shtunën, përfshirë 36 shtetas turq së bashku me aktivistë nga Shtetet e Bashkuara, Italia, Malajzia, Kuvajti, Zvicra, Tunizia, Libia, Jordania dhe vende të tjera, konfirmuan zyrtarët turq.
Gazetari turk dhe pjesëmarrësi në Flotiljen Gaza Sumud, Ersin Celik, u tha mediave lokale se ai pa forcat izraelite duke “torturuar Greta Thunberg”, duke përshkruar se si ajo u “zvarrit përtokë” dhe “u detyrua të puthte flamurin izraelit”.
Aktivistja malajziane Hazwani Helmi dhe pjesëmarrësja amerikane Windfield Beaver dhanë dëshmi të ngjashme në Aeroportin e Stambollit, duke pretenduar se Thunberg u shty dhe u parakalua me një flamur izraelit.
“Ishte një katastrofë. Na trajtuan si kafshë”, tha Helmi, duke shtuar se të paraburgosurve u mohohej ushqimi, uji i pastër dhe ilaçet.
Beaver tha se Thunberg u “trajtua tmerrësisht” dhe “u përdor si propagandë”, duke kujtuar se si u fut në një dhomë ndërsa hynte Ministri i Sigurisë Kombëtare i ekstremit të djathtë, Itamar Ben-Gvir.
Gazetari italian Lorenzo Agostino, i cili kishte qenë në flotilje, përmendi gjithashtu trajtimin e Thunberg.
“Greta Thunberg, një grua e guximshme, është vetëm 22 vjeç. Ajo u poshtërua dhe u mbështoll me një flamur izraelit dhe u ekspozua si një trofe”, tha ai për Anadolu.
Aktivistja turke Aycin Kantoglu tregoi për muret e burgut të njollosura me gjak dhe mesazhet e shkruara nga të burgosurit e mëparshëm. “Ne pamë nëna që shkruanin emrat e fëmijëve të tyre në mure. Në fakt, ne përjetuam pak nga ajo që kalojnë palestinezët”, tha ajo.
Adalah, një grup izraelit për të drejtat e njeriut që ofron ndihmë ligjore, tha se të paraburgosurit raportuan se ishin detyruar të gjunjëzoheshin me duar të lidhura me zinxhir për orë të tëra, u ishte mohuar medikamente dhe u ishte ndaluar të flisnin me avokatët. Ministria e Jashtme e Izraelit i hodhi poshtë pretendimet si “gënjeshtra të plota”, duke këmbëngulur se të gjithë të paraburgosurit ishin trajtuar sipas ligjit.
Izraeli është përballur me dënime në rritje për bastisjen ndaj flotës, ku marina e tij ka ndaluar afërsisht 40 anije që transportonin ndihma për në Gaza dhe ka ndaluar më shumë se 450 persona në bord.
Flotilja, e nisur në fund të gushtit, ishte përpjekja e fundit ndërkombëtare për të thyer rrethimin e Izraelit dhe për të shpërndarë ndihma për palestinezët./Al Jazeera
