Prokuroria Speciale ka ngritur aktakuzë ndaj tre personave B.Sh., A.G., R.Z., si dhe ndaj subjektit juridik SH.P.K “D.C & E”, lidhur me veprat penale: “Keqpërdorim i pozitës apo autoritetit zyrtar”, “Keqpërdorimi dhe mashtrimi në prokurimin publik”, “Mbajtja në pronësi kontroll ose posedim të pa autorizuar të armëve”.
Sipas aktakuzës, më 07.06.2023, si dhe gjatë periudhës nga 18.09.2023 deri më 16.11.2023 në Prizren, B.Sh., në cilësinë e kryeshefit të KRM “Eko Regjioni”, në bashkëkryerje me zyrtarin e kësaj kompanie A.G., kanë tejkaluar kompetencat e tyre me qëllim të përfimit të dobisë pasurore për veten e tyre dhe për personin juridik SH.P.K “D.C & E”.
Në njoftimin e Prokurorisë bëhet e ditur se A.G dhe B.Sh., akuzohen për veprën penale “Keqpërdorim i pozitës apo autoritetit zyrtar”, pasi sipas aktakuzës, kanë krijuar mundësi në kundërshtim me legjilsacionin për prokurimin publik, që tenderin ”Furnizimi me kamiona kompaktor dhe autobusë për nevojat e KRM “Ekoregjionit” në vlerë prej 385,500.00 ta përfitojë subjektit juridik SH.P.K “D.C & E”,
“Sipas aktakuzës, i është shkaktuar dëm buxhetit të KRM “Ekoregjioni” në shumën prej 233,685.37 eurosh.Ndërsa, R.Z akuzohet për veprën penale “Keqpërdorimi dhe mashtrimi në prokurimin publik”, pasi sipas aktakuzës u ka paguar shpenzimet e një udhëtimi jashtë territorit të Kosovës, B.Sh dhe A.G., me qëllim të koordinimit të veprimeve inkriminuese dhe ndikimit për dhënien e tenderit, kështu që paraprakisht ka arritur një marrëveshje të kundërligjore me të pandehurit, duke i përshtatur specifikat teknike”, thuhet në njoftim./teve1.info/
