Prokuroria Speciale e Republikës së Kosovës ka ngritur aktakuzë ndaj pesë personave të dyshuar për kryerjen e veprës penale “Krime lufte kundër popullsisë civile” gjatë luftës në Kosovë.
Sipas njoftimit të Prokurorisë, të akuzuarit me inicialet P.N., Z.D., I.I., S.M. dhe J.D., në cilësinë e pjesëtarëve të Policisë serbe në Stacionin Policor të Fushë-Kosovës, dyshohen se kanë kryer krime lufte më 6 maj 1999.
Aktakuza pretendon se pesë të pandehurit kanë ndaluar dhe marrë me forcë pesë civilë, të cilët fillimisht janë mbajtur nën kontrollin e tyre dhe më pas janë transportuar nga stacioni i trenit në një lokacion të njohur si “Megja”.
Sipas Prokurorisë, në atë vend civilët dyshohet se janë ekzekutuar me armë zjarri.
Meqenëse të pandehurit nuk janë të qasshëm për organet e drejtësisë, Prokuroria Speciale i ka propozuar Gjykatës Themelore në Prishtinë që procesi gjyqësor të zhvillohet në mungesë.
“PSRK-ja i ka propozuar Gjykatës Themelore në Prishtinë mbajtjen e gjykimit në mungesë, pasi të pandehurit janë të paarritshëm për organet e drejtësisë”, thuhet në njoftimin e Prokurorisë.
