Prokuroria Themelore në Prizren ka ngritur aktakuzë ndaj të pandehurit Sh.G. nën dyshimin për shitblerje të narkotikëve.
Ai ishte ndaluar më 2 korrik në pikë kalimin kufitar në Vërmicë, ku në veturën janë gjetur substanca narkotike.
“Sipas aktakuzës, i pandehuri Sh.G., me datë 02.07.2024, në ora 17:35 në Pikën e kalimit kufitar të Vërmicës, pa autorizim transporton substanca apo preparate, të cilat janë shpallur me ligj si narkotikë, në atë mënyrë që pasi policia kufitare kishte ndaluar automjetin e markës ‘’AUDI A8’’, të cilin ishte duke e drejtuar vëllai i të pandehurit, A.G., gjatë kontrollit të automjetit, saktësisht në ulësen e pasme të tij, policia ka gjetur një qese plastike me ngjyrë të verdhë me substancë narkotike të llojit “marihunë”, në peshë të përgjithshme prej 300 gram (treqind gram), të cilën substancë e kishte blerë i pandehuri në Shëngjin të Republikës së Shqipërisë në shumën prej 500 € (pesëqind euro), me qëllim që të njëjtën ta vë në qarkullim për shitje brenda territorit të Republikës së Kosovës”, thuhet në komunikatë.
Prokurori i çështjes me rastin e ngritjes së aktakuzës, i ka propozuar Gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, i pandehuri i lartcekur për veprën penale për të cilën akuzohet të shpallet fajtor dhe të dënohet sipas ligjit.
Sipas aktakuzës, i pandehuri ka synuar ta vinte këtë sasi në shitje në Kosovë.
Vepra penale për të cilën akuzohet Sh.G. që gjendet në paraburgim është “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
