Prokuroria Speciale e Kosovës ka ngritur aktakuzë ndaj gjashtë personave, të dyshuar për përfshirje në një skemë mashtrimi me qendra thirrjesh ndaj shtetasve gjermanë.
Aktakuza është ngritur në Gjykatën Themelore në Prishtinë.
Sipas Prokurorisë, B.D., A.D., L.D., G.D. dhe E.D. ngarkohen për pjesëmarrje ose organizim të grupit kriminal të organizuar, lidhur me veprat penale “Mashtrimi” dhe “Hyrja e paautorizuar në sistemet kompjuterike”.
Ndërkaq, i pandehuri B.C. ngarkohet për veprën penale “Mashtrimi”.
Sipas aktakuzës, pesë të pandehurit kanë vepruar nga viti 2022 deri më 2024 në kuadër të një grupi të organizuar kriminal me karakter ndërkombëtar, duke kryer veprime nga territori i Kosovës ndaj shtetasve të Gjermanisë.
Prokuroria pretendon se aktiviteti është zhvilluar përmes qendrave të thirrjeve, teknologjisë VoIP, numrave telefonikë të maskuar dhe mjeteve të komunikimit elektronik.
Sipas aktakuzës, të pandehurit janë paraqitur me identitete dhe cilësi të rreme, duke u prezantuar si punonjës bankash, zyrtarë policorë apo përfaqësues të institucioneve të tjera.
Qëllimi, sipas Prokurorisë, ka qenë sigurimi i të dhënave personale dhe bankare të viktimave.
Dëmi financiar që, sipas aktakuzës, i atribuohet veprimtarisë së pesë të pandehurve arrin në 211 mijë e 690 euro.
Ndërkaq, B.C. dyshohet se, duke u paraqitur në mënyrë të rreme si punonjës i një banke gjermane dhe duke përdorur emra të rremë, ka kontaktuar shtetas të Gjermanisë dhe ka siguruar të dhëna të ndjeshme bankare.
Sipas aktakuzës, nga këto veprime është shkaktuar dëm prej 149 mijë e 475.04 eurosh.
Hetimi i rastit është zhvilluar në bashkëpunim me autoritetet kompetente të Gjermanisë, përmes mekanizmave të bashkëpunimit juridik ndërkombëtar, si dhe me institucionet vendore të zbatimit të ligjit.
“Prokuroria Speciale e Republikës së Kosovës mbetet e përkushtuar në luftën kundër krimit të organizuar, e posaçërisht në trajtimin dhe hetimin e rasteve me element ndërkombëtar, përmes bashkëpunimit të ngushtë me autoritetet e drejtësisë dhe zbatimit të ligjit vendore dhe ndërkombëtare”, theksohet në fund të njoftimit./teve1.info/
