Njësitë e Drejtorisë për Hetimin e Krimeve Ekonomike dhe Korrupsionit kanë zhvilluar veprime hetimore ndaj disa personave të dyshuar për ushtrim të kundërligjshëm të veprimtarisë mjekësore dhe farmaceutike në Prishtinë.
Sipas raportit 24-orësh të Policisë së Kosovës, rasti ka ndodhur më 17 dhjetor 2025, rreth orës 10:30, ku janë realizuar urdhëresa për kontroll në disa lokacione.
“Gjatë kontrollit është sekuestruar sasi e konsiderueshme e produkteve medicinale, regjistra të ndryshëm të klientëve dhe shërbimeve të ofruara, si dhe pajisje elektronike, përfshirë llaptopë, shtëpiza kompjuterike dhe DVR të kamerave”, thuhet në raportin e Policisë së Kosovës.
Në kuadër të hetimeve, 11 persona janë intervistuar në cilësi të të dyshuarve, në prani të avokatëve mbrojtës, ndërsa katër persona të tjerë kanë pranuar ftesë për t’u paraqitur në organet e hetuesisë.
“Me vendim të prokurorit, të dyshuarit janë liruar, ndërsa rasti do të trajtohet në procedurë të rregullt”, njofton Policia e Kosovës.
Hetimet lidhur me këtë rast janë duke vazhduar në koordinim me organet e drejtësisë.
