Policia e Kosovës ka konfirmuar se me kërkesë të Prokurorisë Speciale dhe me urdhër të Gjykatës kompetente është duke kryer bastisje në Agjencinë për Zhvillim të Bujqësinë në kuadër të Ministrisë së Bujqësisë.
Aksioni po zhvillohet në dyshimin për keqpërdorim të detyrës zyrtare.
“Policia e Kosovës me njësitë e saja relevante, me kërkesë të Prokurorisë Speciale, bazuar në urdhëresën e Gjykatës kompetente ka filluar zbatimin e një urdhërkontrolli në Prishtinë, mbi dyshimet për keqpërdorim të detyrës zyrtare. Pas përfundimit të operacionit policor, i cili po realizohet në bashkëpunim dhe koordinim me organet e drejtësisë, mund të bëhen publike informacione shtesë”, ka thënë për teve1, Baki Kelani zëdhënës i Policisë së Kosovës.
Prokuroria Speciale ka thënë se bastisjet po zhvillohen mbi dyshimet për Fabrikën për përpunimin e mbetjeve shtazore.
“Ju njoftojmë se Policia e Kosovës, me urdhër të Prokurorisë Speciale të Republikës së Kosovës është duke zhvilluar bastisje në katër lokacione. Bastisjet po zhvillohen mbi dyshimet për Fabrikën për përpunimin e mbetjeve shtazore. Për detaje të tjera, publiku do të njoftohet gjatë ditës”, ka deklaruar Arbnora Luta, zëdhënëse e Prokurorisë Speciale
