Lokali është mbyllur e lëvizjet e qytetarëve në këtë zonë janë të rralla.
Kjo pasi që në këtë vend në veri të Mitrovicës, tash e shumë kohë, modifikoheshin armë të llojeve të ndryshme.
E nën dyshimin se aty zhvillohej veprimtari ilegale, Policia e Kosovës të mërkurën kreu një aksion, ku një person përfundoi nën pranga.
Brenda shtëpisë së të dyshuarit, u pa edhe një uniformë ushtarake serbe dhe pajisje për përpunim të armëve.
Vëllai i të arrestuarit tha për Tëvë1 se nuk e di nëse vëllai i tij është marrë edhe me veprimtari ilegale.
“Unë sa di, nuk e besoj, se kjo është dugoja për rregullimin e armëve, me qenë tergovinë me i shitë, nuk është pilar nuk besoj”, tha ai.
Ai shtoi se me përpunimin e armëve, vëllai i tij ka punuar tash e 45 vite.
Ndërkaq për arrestimin e tij, bëri të ditur se kanë angazhuar edhe avokatin mbrojtës.
“Ai punon këtë punë ka 45 vite me siguri, sëpari ka punuar babagjyshi, pastaj baba ai e ka trashëgua. Ka ardhë Njësia Speciale me shiku çfarë ka. Ai e punon këtë punë kur i ka pasë 20 vite me babën bashkë. E kemi angazhua, te këqyrim qysh del çfarë del.. S’po më vjen bash mirë por çfarë të bëjmë, gjithkush e ka punën e vet ..”, thotë ai.
Brenda shtëpisë, ai tregoi pajisjet me të cilat janë kryer përpunimet e armëve.
“Këtu i ka gjërat që ka punuar, hekura dhe gjëra të tjera, ka punuar edhe mjeshtër i veturave, grepa për të zënë peshqi”, thotë Salih Laqkoviq.
Lidhur me rastin, nga Prokuroria Themelore e Mitrovicës thanë se do të kërkohet masa e paraburgimit ndaj të dyshuarit, derisa i njëjti ngarkohet për veprën penale “import, eksport, furnizim dhe modifikim të armëve”.
“Prokuroria Themelore e Mitrovicës do të bëjë kërkesë për caktimin e masës së paraburgimit ndaj të njëjtit. Këtu dyshohet se ka qenë një punishte e cila dyshohet se është përdorë për modifikimin e armëve dhe gjatë aksionit janë gjetur dhe sekuestruar pjesë të ndryshme të armëve si dhe makina që janë përdorur për modifikim të armëve”, ka thënë zëdhënësi Valon Preteni.
Gjatë së mërkurës, Policia e Kosovës kreu aksion në ndërtesën e njohur si “Vampirusha” ku në bodrumin e saj hasën në tri mina-hedhës, jelek anti-plumb, helmeta balistike, dy çanta ushtarake, një gazmaskë.
Për këtë rast, sipas Policisë nuk ka persona të arrestuar.
