Zëdhënësi i Doganës së Kosovës, Adriatik Stavileci, thotë se operacioni kundër piratërisë dhe falsifikimit në tri regjione të Kosovës ka rezultuar i suksesshëm.
Stavileci për teve1.info ka bërë të ditur se nga operacioni është sekuestruar mall në sasi prej 720 njësi, që dyshohet se është i falsifikuar dhe ka shkelur të drejtat e markave tregtare të regjistruara në territorin e Kosovës.
“Sipas kategorisë mallrat e sekuestruara janë kryesisht tekstil, çanta dhe aksesor për femra të markave të njohura ndërkombëtare (Louis Vuitton, Gucci dhe Michael Cors, Pandora, Hugo Boss, Polo, Nike, Gant, Lacoste, North Face, Calvin Klein, Prada, Guess”, ka thënë ai.
Tutje, ai tha se nga 11 subjekte, 3 kanë qenë të mbyllura dhe si rezultat, konform kompetencave janë mbyllur përkohësisht.
“Në Regjionin e Gajkovës ende është duke u zhvilluar operacioni dhe deri në përfundim të kontrollit nuk kemi të dhëna të sakta për sasinë e mallit edhe pse nga informatat preliminare të zyrtarëve të terrenit është konstatuar se është gjetur një sasi e konsiderueshme e mallit që dyshohet se është i falsifikuar”, deklaroi ai.
Mallrat e sekuestruara mbesin nën mbikëqyrje doganore deri në verifikimin e origjinalitetit nga bartësit e së drejtës.
Operacioni është realizuar edhe në bashkëpunim me Policinë e Kosovës.
/teve1.info/
