Policia e Kosovës ka arrestuar dy persona të dyshuar për posedim dhe shpërndarje të substancave narkotike gjatë një operacioni në Ferizaj.
Sipas njoftimit, gjatë aksionit policor në kuadër të planit “Stop droga”, është ndalur një veturë e dyshuar, ndërsa njëri nga të dyshuarit ka tentuar të largohet, por është arrestuar nga njësitë policore.
Gjatë kontrollit në veturë dhe në disa lokacione të tjera të lidhura me rastin, policia ka gjetur dhe sekuestruar sasi të ndryshme të dyshuara narkotike të llojit marihuanë, peshore digjitale, telefona mobil, para të gatshme dhe pajisje të tjera që dyshohet se janë përdorur për paketim dhe shpërndarje.
Me urdhër të prokurorit, të dy të dyshuarit janë intervistuar dhe më pas janë ndaluar për 48 orë, ndërsa rasti është iniciuar për veprën penale “blerja, posedimi dhe shitja e paautorizuar e narkotikëve”.
