Disa lokale gastronomike, ordinanca dentare, ambulanca gjinekologjike dhe poliklinika të paregjistruara në Mitrovicën Veriore, të enjten janë mbyllur përkohësisht.
Sipas Komunës së Mitrovicës Veriore, vendimi është marrë pas një aksioni të përbashkët të Drejtorisë së Inspektimit dhe inspektorëve sanitarë të Ministrisë së Shëndetësisë.
“Deri më tani janë kryer dhjetëra kontrolle gjatë dhe pas orarit zyrtar, si edhe në orët e vona të natës. Subjektet punonin pa leje, në ambiente të papërshtatshme, ndërsa në disa ordinanca mjekët banonin në të njëjtat hapësira”, thuhet në njoftim.
Tutje, është bërë e ditur se produktet jo të rregullta janë konfiskuar, janë hartuar procesverbale, janë vendosur masa ndëshkuese, ndërsa janë urdhëruar masa të detyrueshme për legalizim urgjent e adaptim sanitar.
Në fund, Komuna ka apeluar qytetarët që të përdorin vetëm objekte të regjistruara nën mbikëqyrjen institucionale për sigurinë dhe shëndetin e tyre.
“Falënderojmë qytetarët për besimin dhe informacionet me kohë që mundësuan ndërhyrjen efikase”, theksohet në njoftim.
