Ministria e Industrisë, Ndërmarrësisë, Tregtisë dhe Inovacionit (MINTI) ka intensifikuar kontrollet për mbrojtjen e të drejtës së autorit dhe të drejtave të përafërta.
Përmes Inspektoratit Qendror të Mbikëqyrjes së Tregut (IQMT), ekipet inspektuese gjatë ditës së sotme kanë zhvilluar kontrolle në subjekte ekonomike në rajonet e Prishtinës dhe Gjilanit.
Fokus i inspektimeve kanë qenë bizneset që merren me fotokopjim, riprodhim dhe shpërndarje të materialeve të mbrojtura nga e drejta e autorit.
Sipas MINTI-t, qëllimi i aksionit është verifikimi i respektimit të kërkesave ligjore gjatë përdorimit dhe riprodhimit të materialeve të mbrojtura, si dhe parandalimi i rasteve të shfrytëzimit të paautorizuar të veprave të mbrojtura.
Inspektimet janë realizuar në bazë të Ligjit për të Drejtën e Autorit dhe të Drejtat e Përafërta, si dhe në kuadër të kompetencave të përcaktuara me Ligjin për Inspektoratin Qendror të Mbikëqyrjes së Tregut.
MINTI dhe IQMT kanë bërë të ditur se kontrollet do të vazhdojnë edhe në rajone të tjera të Kosovës, duke marrë parasysh edhe ankesat dhe informacionet e pranuara nga qytetarët për raste të dyshuara të shkeljes së të drejtës së autorit dhe piraterisë.
Institucionet thonë se përmes këtyre aksioneve synojnë mbrojtjen e të drejtave të autorëve, rritjen e ndërgjegjësimit të bizneseve dhe krijimin e një tregu ku aktiviteti ekonomik zhvillohet në përputhje me ligjin.
