Një operacion i zhvilluar nga Policia e Kosovës kundër trafikimit të narkotikëve ka rezultuar me sekuestrimin e një sasie të madhe të substancës së dyshuar marihuanë dhe arrestimin e tre personave të dyshuar.
Aksioni është realizuar nga Drejtoria për Hetimin e Trafikimit me Narkotikë në kuadër të një plani operativ të koduar “Kontrolli”. Gjatë operacionit janë monitoruar dhe ndaluar dy automjete që dyshohej se po përdoreshin për transportimin e lëndëve narkotike.
Autoritetet fillimisht kanë identifikuar dy vetura me targa të Serbisë në Pikën Kufitare të Vërmicës. Më pas, njëra prej tyre është ndaluar në Zveçan, ndërsa automjeti tjetër në Jarinjë.
Kontrolli i veturës së ndaluar në Zveçan ka zbuluar hapësira të fshehta të përshtatura posaçërisht për transport të drogës. Brenda tyre janë gjetur dhe sekuestruar rreth 25.9 kilogramë substancë që dyshohet të jetë marihuanë.
Sipas hetimeve fillestare, automjeti i dytë dyshohet se ka shërbyer për mbikëqyrjen e rrugës dhe sigurimin e lëvizjes së automjetit që transportonte narkotikët.
Në vendin e ngjarjes kanë dalë edhe njësitë e forenzikës për të kryer ekzaminimet e nevojshme, ndërsa tre të dyshuarit janë vënë në pranga. Bëhet fjalë për një shtetas të Serbisë dhe dy shtetas të Malit të Zi.
