Në kuadër të aksioneve në veri të vendit, Inspektorati Farmaceutik ka zhvilluar një aktivitet inspektues në dy barnatore private në qytetin e Mitrovicës së Veriut, ku është hasur një sasi e madhe e produkteve medicinale të paautorizuara për tregun e Republikës së Kosovës.
Sipas konfirmimit për Tëvë1 nga Edon Muçaj nga Inspektorati Farmaceutik, produktet e konfiskuara kishin banderola të Serbisë, Maqedonisë së Veriut, si dhe disa prej tyre ishin pa banderola fare, duke e bërë të qartë se ishin të futura në mënyrë të paligjshme në treg.
“Produktet janë konfiskuar nga ana e Inspektoratit Farmaceutik dhe ditëve në vijim do të vazhdohet me procedurat e rregullta ligjore,” ka deklaruar Muçaj.
Gjatë inspektimit nuk është regjistruar asnjë incident, ndërsa Inspektorati ka paralajmëruar se aksionet dhe kontrollet në këtë pjesë të vendit do të vazhdojnë edhe në ditët në vijim për të garantuar siguri dhe kontroll të rreptë mbi qarkullimin e produkteve farmaceutike.
