Nëna e njërit prej drejtuesve të policisë së Beogradit ndërroi jetë më 8 prill, ndërsa babai i tij, i cili ndodhej në gjendje kritike pas aksidentit të ndodhur më 21 mars, sot ka ndërruar jetë si pasojë e plagëve të marra.
Babai i njërit prej drejtuesve të policisë së Beogradit sot ndërroi jetë si pasojë e plagëve të marra në një aksident trafiku, i cili u shkaktua më 21 mars nga një pjesëtar i sigurimit të Milan Radoiçiqit. Edhe nëna e këtij polici, e cila gjithashtu ishte lënduar në atë aksident në Graçevinicë, pranë Brusit, në rrugën drejt Kopaonikut, kishte ndërruar jetë më 8 prill. Babai i policit kishte qenë në gjendje kritike dhe rrezik për jetën që nga momenti i aksidentit dhe ishte shtruar në kujdes intensiv në Beograd, ku edhe ka ndërruar jetë.
Aksidentin tragjik e ka shkaktuar Miloš Milenković, pjesëtar i sigurimit joformal të Radoiçiqit, i cili bashkë me të është i akuzuar për terrorizëm në Banjskë nga autoritetet në Prishtinë. Për këtë kemi shkruar me detaje në tekstin “Banda e Banjskës mbi ligjin”. Prokuroria Themelore Publike në Brus ka konfirmuar se ndaj të dyshuarit Miloš Milenković është hapur hetim, por ai gjatë gjithë kohës gjendet në liri.
