Siguria rrugore në Shqipëri vijon të mbetet në nivele alarmante, sidomos pas aksidentit tragjik në Durrës ku humbën jetën dy fëmijë dhe një tjetër mbeti i lënduar rëndë.
Bilanci i tre javëve të fundit është veçanërisht shqetësues, raporton JOQ Albania, sipas të cilës 23 persona kanë humbur jetën në aksidente rrugore, një shifër që tregon për një situatë jashtë kontrollit.
Ekspertët theksojnë se problemi është i hershëm dhe se ndërhyrjet e deritanishme nuk kanë arritur të japin efektin e duhur. Infrastruktura rrugore dhe sinjalistika mbeten të pamjaftueshme, ndërsa masat parandaluese nuk kanë frenuar rritjen e numrit të aksidenteve.
Një faktor i rëndësishëm konsiderohet edhe përkeqësimi i sjelljes së drejtuesve të mjeteve. Shpejtësia e lartë, përdorimi i alkoolit dhe substancave narkotike, si dhe qarkullimi me automjete të fuqishme po ndikojnë drejtpërdrejt në rritjen e rrezikut në rrugë.
