Një aksident i rëndë trafiku ka ndodhur sot në autostradën “Ibrahim Rugova”, në kilometrin e 52-të të segmentit Prishtinë-Malishevë.
Sipas informacioneve të para, një veturë ka dalë nga kontrolli dhe është përplasur në mbrojtëset anësore të rrugës, me ç’rast janë lënduar dy persona, një burrë dhe një grua.
Komandanti i njësisë së autostradës në Policinë e Kosovës, Ismajl Fejzullahu, ka bërë të ditur se burri ka arritur të dalë vetë nga automjeti, ndërsa për nxjerrjen e gruas është kërkuar ndërhyrja e zjarrfikësve.
“Të dy të lënduarit kanë qenë me vetëdije dhe me shenja jete. Ata janë dërguar në Prishtinë për trajtim mjekësor, ndërsa gruaja ka pësuar lëndime më të rënda”, ka deklaruar Fejzullahu.
Si pasojë e aksidentit, njëri shirit i autostradës është bllokuar përkohësisht, ndërsa autoritetet kanë njoftuar se qarkullimi pritet të normalizohet së shpejti.
