Një person ka humbur jetën, ndërsa dy të tjerë kanë mbetur të lënduar si pasojë e një aksidenti që ka ndodhur pasditën e së martës në fshatin Begrac të Kaçanikut.
Zëdhënësi i Policisë për rajonin e Ferizajt, Kanun Veseli për tëvë1.info ka bërë të ditur se në aksident kanë qenë të përfshira dy vetura.
Veseli, po ashtu ka njoftuar se viktima ka ndërruar jetë në Qendrën Klinike Universitare të Kosovës (QKUK), si pasojë e plagëve të marra.
Ndërkaq, dy personat e tjerë të lënduar janë dërguar për trajtim në Qendrën e Mjekësisë Familjare në Kaçanik.
“Ju njoftojmë se më datën 23.09.2025, rreth orës 15:20, në fshatin Begrac të Kaçanikut, ka ndodhur një aksident trafiku. Në aksident kanë qenë të përfshira dy vetura, ku si pasojë kanë pësuar lëndime trupore tre persona. Njëri nga të lënduarit, pasi ka marrë ndihmën e parë mjekësore në Qendrën Emergjente në Ferizaj, është dërguar për trajtim të mëtutjeshëm në QKUK – Prishtinë. Dy personat e tjerë të lënduar janë dërguar për trajtim në Qendrën e Mjekësisë Familjare në Kaçanik. Rreth orës 22:00, jemi njoftuar se personi i dërguar në QKUK, rreth moshës 77 vjeçare, fatkeqësisht ka ndërruar jetë si pasojë e lëndimeve të marra. Njësitet e Hetimeve të Aksidenteve kanë dalë menjëherë në vendin e ngjarjes dhe po hetojnë shkaqet e aksidentit. Për veprimet policore është njoftuar edhe Prokurori i Shtetit. Për informata shtesë lidhur me rrethanat e aksidentit, do të njoftoheni me raportin vijues”, ka thënë Veseli./teve1.info/
