Një person ka humbur jetën si pasojë e një aksidenti trafiku mes një veture dhe një motoçiklete në Prizren.
Sipas Policisë së Kosovës, aksidenti ka ndodhur mes një veture, të cilën e drejtonte një grua, dhe një motoçiklete me drejtues një person të gjinisë mashkullore.
Si pasojë e aksidentit, motoçiklisti ka pësuar lëndime të rënda dhe ka ndërruar jetë. Vdekja e tij është konstatuar nga ekipi mjekësor në Spitalin e Prizrenit.
Me vendim të prokurorit, trupi i pajetë është dërguar në Institutin e Mjekësisë Ligjore për obduksion.
Ndërkohë, shoferja e veturës është arrestuar dhe, me vendim të organeve kompetente, është dërguar në mbajtje.
“Është raportuar për një aksident trafiku mes një veture me drejtuese të dyshuarën kosovare dhe një motoçiklete me drejtues viktimën mashkull kosovar. Si pasojë e aksidentit drejtuesi i motoçikletës ka ndërruar jetë, vdekjen e të cilit e ka konstatuar ekipi mjekësor në Spitalin e Prizrenit”, thuhet në raportin e Policisë së Kosovës.
