Një aksident tragjik trafiku ka ndodhur pas mesnate në rrugën nacionale Prishtinë–Pejë, saktësisht në fshatin Korroticë të Drenasit, ku për pasojë ka humbur jetën një person.
Sipas zëdhënësit të Policisë, Daut Hoxha, i cili e ka konfirmuar për Tëvë1 aksidenti ka ndodhur rreth orës 02:00, kur një veturë e tipit Toyota Corolla ka humbur kontrollin gjatë lëvizjes dhe është rrokullisur në shiritin e majtë të rrugës.
“Shoferi i automjetit, A.B., 49-vjeçar, ka pësuar lëndime të rënda dhe është transportuar menjëherë me autoambulancë në Qendrën e Mjekësisë Familjare (QMF) në Komoran. Megjithatë, pavarësisht përpjekjeve të mjekëve, ai ka ndërruar jetë në orën 03:10, ku mjeku kujdestar ka konstatuar vdekjen e tij”, kanë thënë nga policia.
Në vendin e ngjarjes kanë dalë njësitë policore, hetuesit dhe prokurori kujdestar, i cili ka urdhëruar që trupi i pajetë të dërgohet për obduksion në Institutin e Mjekësisë Ligjore.
Hetimet lidhur me shkaqet e aksidentit janë ende në zhvillim.
