Një aksident tragjik trafiku ka ndodhur në Skenderaj, ku si pasojë e përplasjes mes dy veturave ka humbur jetën një fëmijë, ndërsa gjashtë persona të tjerë kanë pësuar lëndime trupore.
Sipas Policisë së Kosovës, në aksident janë përfshirë dy vetura me vozitës meshkuj, njëri shtetas i huaj dhe tjetri kosovar. Të lënduarit janë tri femra dhe tre meshkuj, të gjithë me shtetësi kosovare.
Viktimat janë dërguar për trajtim mjekësor, por fatkeqësisht njëra prej tyre, një fëmijë, nuk ka arritur të mbijetojë. Vdekja është konfirmuar nga mjeku kujdestar.
Policia e Kosovës përmes raportit zyrtar ka bërë të ditur:
“Skenderaj, 24.07.2025, 19:32 Është raportuar se ka ndodhur aksident trafiku në mes dy veturave me vozitës meshkuj, njëri shtetas i huaj ndërsa tjetri kosovar. Përveç dëmeve materiale lëndime trupore kanë pësuar gjashtë viktimat, tri femra dhe tre meshkuj kosovarë. Viktimat janë dërguar për tretman mjekësor, ndërsa nga mjeku kujdestar është konfirmuar se njëra viktimë-femije, ka ndërruar jetë. Me vendim të prokurorit viktima dërgohet në IML për obduksion”, thuhet në raportin e PK-së.
Me vendim të prokurorit, trupi i pajetë i viktimës është dërguar në Institutin e Mjekësisë Ligjore për obduksion, ndërkohë që hetimet për zbardhjen e shkaqeve të aksidentit janë duke vazhduar.
