Një aksident i rëndë trafiku ka ndodhur sot në rrugën “Skenderbeu” në Podujevë, ku një person ka humbur jetën dhe katër të tjerë janë lënduar. Lajmin e ka konfirmuar Flora Ahmeti, zëdhënëse e Policisë për rajonin e Prishtinës.
“Sot rreth orës 17:30 kemi pranuar informatën se në rrugën ‘Skenderbeu’ në Podujevë, ka ndodhur një aksident trafiku me pasoja fatale. Në këtë aksident ka qenë e përfshirë një veturë dhe një kamion në lëvizje, më pas janë goditur rrethojat e një objekti dhe disa automjete të parkuara,” tha Ahmeti.
Zëdhënësja e policisë shtoi se ngasësi i kamionit ka humbur jetën, ndërsa katër persona të tjerë janë dërguar për tretman mjekësor:
“Në këtë aksident ngasësi i kamionit ka humbur jetën dhe janë lënduar katër persona të tjerë. Vdekja e viktimës është konstatuar nga ekipi mjekësor në vendngjarje dhe trupi i pajetë është dërguar për obduksion, ndërkohë që personat e lënduar janë dërguar për tretman mjekësor. Me rastin po merret njësiti i trafikut rajonal,” tha Ahmeti.
Rasti mbetet nën hetim nga Policia e Rajonit të Prishtinës, ndërsa shkaqet e aksidentit do të sqarohen pas përfundimit të procedurave hetimore.
