Një grua ka humbur jetën si pasojë e një aksidenti trafiku që ka ndodhur mbrëmjen e së enjtes në fshatin Zabel i Ulët të Drenasit.
Sipas Policisë së Kosovës, ngjarja ka ndodhur kur drejtuesi i automjetit nuk e kishte përshtatur shpejtësinë me kushtet e rrugës, duke humbur kontrollin dhe duke dalë nga rruga, ku më pas vetura kishte përfunduar në një kanal.
“Raportohet se i dyshuari mashkull kosovar, si pasojë e mospërshtatjes së shpejtësisë me kushtet e rrugës, humb kontrollin mbi veturë, del jashtë rruge dhe përfundon në një kanal. Si pasojë, drejtuesi dhe katër pasagjerë (tre femra dhe një mashkull kosovar) kanë pësuar lëndime trupore dhe janë dërguar për tretman mjekësor në QKUK, ku njëra nga pasagjeret, si pasojë e lëndimeve, ka ndërruar jetë”, thuhet në raportin e policisë.
Policia njofton se me vendim të prokurorit, trupi i pajetë është dërguar në IML për obduksion.
Tre personat e tjerë të lënduar po marrin trajtimin e nevojshëm mjekësor, ndërsa hetimet lidhur me rastin janë duke vazhduar.
