Një aksident i rëndë trafiku ka ndodhur sot në fshatin Rudare, afër Zveçanit, ku janë përfshirë një veturë e policisë dhe një automjet civil.
Sipas të dhënave të konfirmuara për Teve1 nga Munish Avdiu, nga Drejtoria e Trafikut në Policinë e Kosovës për rajonin e veriut, aksidenti ka shkaktuar lëndime te pesë persona:
“Në këtë aksident kanë qenë të përfshira dy automjete, një automjet civil me targa vendore dhe një automjet zyrtar i Policisë së Kosovës. Si pasojë e aksidentit, lëndime kanë pësuar pesë persona, tre nga automjeti civil dhe dy zyrtarë policorë, të cilët janë duke pranuar trajtim mjekësor,” tha Avdiu.
Personat e lënduar janë dërguar për trajtim në Spitalin Rajonal të Mitrovicës, ndërsa njësitë policore kanë nisur hetimet për të sqaruar shkaqet e aksidentit.
Policia e Kosovës po ashtu ka njoftuar për aksidentin.
“Me datë 24.12.2025, rreth orës 09:23, Policia e Kosovës është informuar për një aksident trafiku në rrugën nacionale Mitrovicë–Leposaviq, përkatësisht në fshatin Rudare. Fillimisht kanë dalë njësitë nga Drejtoria Rajonale e Policisë Mitrovicë Jug, ndërsa më pas, për shkak të përgjegjësisë territoriale, në vendngjarje kanë dalë njësitë e trafikut rrugor Mitrovicë Veri, stafi mjekësor dhe zjarrfikësit. Rasti është duke u hetuar nga njësitë kompetente për të përcaktuar shkaqet e aksidentit. Lidhur me këtë rast është njoftuar edhe Inspektorati Policor i Kosovës.”, thuhet në njoftimin e policisë
Policia apelon tek të gjithë pjesëmarrësit në trafik për kujdes të shtuar.
“Policia e Kosovës apelon tek të gjithë pjesëmarrësit në trafik që të kenë kujdes të shtuar gjatë ngasjes së automjeteve dhe të respektojnë rregullat e trafikut,” thuhet në njoftim tutje.
