Një hotel në Banjskë të Zveçanit është marrë nën kontroll nga Agjencia Kosovare e Privatizimit. Kjo u arrit me asistim të Policisë së Kosovës, derisa aryset e këtij veprimi ende nuk dihen.
Mesditën e së martës, disa njësite të Policisë së Kosovës, morën udhë për në veri.
Cak i tyre ishte hoteli “Rajska Banja” në fshatin Banjskë të Zveçanit.
Kësaj radhe ata ishin vetëm asistues të një institucioni tjetër të Kosovës.
Agjencia Kosovare e Privatizimit ia kishte mësyrë një hoteli në këtë zonë periferike të vendit.
Me ndihmën e Policisë së Kosovës, AKP, mori në kontroll të saj, hotelin ”Rajska Banja”.
“Sot rreth orës 12:00 kemi asistuar AKP-në, në marrjen nën menaxhim të kompleksit hotelier “Rajska Banja. Nuk ka ndonjë problem”, tha zëvendësdrejtori i Policisë për Veri, Veton Elshani.
E AKP ka dhënë më shumë detaje për këtë operacion.
“Policia e Kosovës i ka ofruar asistence AKP-së pas kërkesës për të vendosur nën administrim objektet e N.Sh. Trepça Standard në Banjskë. Toka dhe ish-objekti (i rinovuar pa leje nga entitet ende të panjohura për AKP-në) janë pronë e N.Sh. Trepça Standard, me seli në Mitrovicën e Veriut e cila është nën autoritetin e AKP-së. Me që AKP nuk ka pasur qasje në atë pjesë deri më tani, pas krijimit të kushteve dhe qasjes dhe pas marrjes se informacioneve që ka pasur edhe veprimtari të paligjshme në këto objekte, AKP me asistencë të policisë ka vendosur pronën nën administrim të saj. Para se të merren këto masa AKP ka tentuar të kontaktoj palët që kanë shfrytëzuar këto objekte deri tani, por s’ka pasur sukses as t’i identifikoj dhe as t’i kontaktojë”, thuhet në përgjigjen e AKP-së.
Aksioni ka vazhduar gjatë tërë ditës.
