Ka vite që është premtuar se do të shuhet.
Por, Agjencia Kosovare e Privatizimit jo vetëm që nuk u shua, por këtë javë mbajti ceremoninë e radhës për të shpallur rezultatet e ofertave për shitjen e 134 pronave.
Rrugën për të dorëzuar ofertat e tyre e morën 63 persona.
Vetë partia në pushtet, Lëvizja Vetëvendosje, që kishte propozuar shuarjen e këtij institucioni, ka një arsyetim për mos ndërmarrjen e këtij veprimi.
“Shuarja e AKP-së është paraparë të ndodhë krahas themelimit të Fondit Sovran. Ligji për Fondin Sovran i hap rrugës shuarjes së këtij institucioni. Por siç e dini, Ligji për Fondin Sovran është ende në rishikim të Gjykatës Kushtetuese për më shumë se 1 vjet e gjysmë tani (nga dhjetori i vitit 2023), përtej çdo afati ligjor, pas kontestimit që i kanë bërë ligjit partitë opozitare PDK dhe LDK. Asetet e paprivatizuara dhe që kanë potencial komercial i barten Fondit Sovran të Republikës së Kosovës. Asetet e tjera që nuk janë likuiduar do të menaxhohen nga institucionet përgjegjëse për administrimin e pronës”, ka thënë zëdhënësi i Qeverisë në detyrë, Përparim Kryeziu.
Këtë të mërkurë, interesimi i ofertuesve për pronat ishte i madh.
E ekonomisti, Safet Gërxhaliu thotë se duhet të ketë transparencë llogaridhënie më të madhe.
“Këto asete të shitura të mos janë vetëm profit i individit dhe grupit, por në interes të shtetit dhe qytetarit. Nuk ka biznes planë të mirëfilltë nuk ka spin- off special, edhe ato që janë privatizuar me spin-off special janë shumë më tepër të shkatërruara dhe të rrënuar duke ndërtuar objekte për shitje dhe e gjithë kjo e ka ngulfat perspektive për zhvillim ekonomik shumëdimensional në Kosovë. Besoj që është koha për një llogaridhënie, është koha që sundimi i rendit dhe ligjit të mos mbetet vetëm i shkruar, por të është në funksion të zhvillimit dhe besoj që këto që po ndodhin kohët e fundit me privatizimin dhe privatizimin në heshtje të shumë pasurive të Kosovës janë fenomen që duhet t’i ketë parasysh prokuroria dhe ligji në Kosovë”, shprehet ai.
Procesi i privatizimit të ndërmarrjeve shoqërore dhe aseteve të tjera në Kosovë, ka nisur dy dekada më parë.
