Fillimisht për këtë parcelë toke i kishte dalë punë me Ministrinë e Infrastrukturës. Ky dikaster në vitin 2014 kishte larguar rrethojën 12 metërshe në Terminalin doganor në Han të Elezit, edhe pse ajo veçse ishte e privatizuar.
Për këtë veprim, Gjykata Themelore në Ferizaj kishte marrë vendim, sipas të cilit, ishte Ministria e Infrastrukturës ajo që e kishte penguar punën e këtij terminali. I njëjti vendim kishte marrë edhe formën e prerë, duke u vërtetuar edhe nga Apeli e Supremja. Për çka MI u urdhërua që të mos ndërhyjë më në pronën private të Terminali sh.p.k.
E të premten, për parcelën e njëjtë, Agjencia Kosovare për Privatizim erdhi në shoqërinë e Njësisë Speciale të Kosovës.
E gjithë kjo, sipas drejtorit menaxhues të “Terminali Sh.P.K”, Xhevdet Bajramaliu është shkelje e vendimeve të gjyqësorit.
Bajramaliu pretendon se ky veprim ka ardhur për të favorizuar konkurrentët e tij. Ai ka paralajmëruar padi ndaj AKP-së për pengim të shfrytëzimit të pronës së dhënë në shfrytëzim.
E AKP-ja, përmes një përgjigje me shkrim ka thënë se në asnjë vendim të gjykatës, Agjencia nuk kontestohet si institucion përgjegjës për administrimin e këtyre pronave shoqërore.
“AKP, përmes shkresave ka kërkuar nga shfrytëzuesi që të largoj muret lëvizëse të betonit të cilat janë vendosur pa lejen e AKP-së si administratore e NSh-së apo PMN Sharr si pronare e këtyre parcelave deri me datë 28 shkurt 2022, ora 15:00. Megjithatë, shfrytëzuesi nuk ka vepruar sipas kërkesave të AKP-së dhe sot, me kërkesë të AKP-së dhe me asistencën e Policisë pengesat janë hequr dhe rruga është liruar për qarkullim të qytetarëve”, thuhet në përgjigjen e AKP-së.
Televizioni ka tentuar të marrë edhe një qëndrim nga Ministria e Infrastrukturës, për prezencën e dy zyrtarëve të saj në këtë aksion, por nuk ka marrë përgjigje.
Raportii gazetares, Florijeta Dernjani.
