Kushtrim Ajvazi nga Shoqata e Prodhuesve të Kosovës, në një lidhje direkte në emisionin “Ditari” në Tëvë1, ka komentuar vendimin e fundit të Gjykatës Komerciale, e cila ka pezulluar përkohësisht vendimin e Zyrës së Rregullatorit për Energji (ZRrE) për lejimin e daljes në treg të lirë të energjisë për pesë kompani.
Sipas Ajvazit, rasti nuk është i izoluar vetëm te këto pesë kompani, por bëhet fjalë për një numër të madh biznesesh që kanë paraqitur padi në Gjykatën Komerciale kundër vendimit të ZRrE-së.
“Jo vetëm këto 5 kompani, por edhe shumë të tjera kanë paraqitur padi për pezullimin e vendimit për daljen në tregun e lirë të energjisë. Po presim edhe vendime të tjera nga gjykata, sepse numri i kompanive që kanë iniciuar këtë proces është i konsiderueshëm,” ka deklaruar Ajvazi.
Ai shtoi se në javën e kaluar, Gjykata Themelore kishte refuzuar një kërkesë të përbashkët nga një grup kompanish që kishin synuar ta sfidonin vendimin në mënyrë kolektive. Si rrjedhojë, rasti është dërguar në Gjykatën e Apelit.
“Ne kemi kërkuar që ta ndjekim rastin si grup dhe jo individualisht, mirëpo ajo kërkesë u refuzua. Tani jemi në pritje të vendimit të Apelit,” ka sqaruar Ajvazi.
Ai gjithashtu ngriti shqetësimin për pasigurinë që po krijon vonesa në përcaktimin e çmimit të energjisë për muajin qershor dhe korrik.
“Sot jemi më 14 korrik dhe ende nuk kemi marrë një përgjigje për çmimin që do të paguajmë për muajin qershor. Kemi hyrë në gjysmën e muajit korrik dhe nuk dihet se çfarë do të ndodhë,” ka përfunduar ai.
