Driton Ajazi, bartës i listës për asamble në Komunën e Drenasit nga radhët e PDK-së, ka akuzuar kryetarin e rizgjedhur të kësaj komune, Ramiz Lladrovcin i cili të dielën fitoi si i pavarur duke mposhtur PDK-në.
Ai ka thënë se Lladrovci ka pasur marrëveshje të fshehta me parti tjera politike, duke përmendur Vetëvendosjen.
Si argument ka përmendur votat që ka marrë kandidatja e Vetëvendosjes për kryetare, Egzona Tërdevci dhe numrin e votave që VV ka marrë për asamble.
“Marrëveshje e fshehtë me partitë tjera politike të cilët e kanë mbështet z. Lladrovci për kryetar, ndërsa në listën për asamble i kanë mbështetur kandidatët e tjerë. Vetëvendosje dhe eksponent të saj haptas e kanë mbështet z. Lladrovcin, cka e tregon rezultati”, ka thënë Ajazi në emisionin “InfoNata” në Tëvë1.
Ajazi i cili në zgjedhjet e vitit 2021 ishte kundërkandidat i PDK-së dhe Ramiz Lladrovcit me iniciativën e tij “Demokratët për Drenasin”, ka thënë se Lladrovci nuk është më pjesë e PDK-së.
“Ka themeluar një iniciativë dhe ka dal nga strukturat e PDK-së dhe tani më nuk është pjesë e Partisë Demokratike”, ka thënë ai.
Lladrovci ka fituar në raundin e parë në Drenas duke mundur kandidatin e PDK-së, Petrit Hajdari dhe duke bërë që PDK për herë të parë pas luftës të mos fitojë në këtë komunë.
