Partia Socialdemokrate e Kosovës, ka vendosur sot para Qeverisë së Kosovës, 205 mijë nënshkrimet e qytetarëve të peticionit të vitit 2016-të kundër marrëveshjes për Asociacionin e Komunave me Shumicë Serbe.
Lidhur me këtë aksion, ka reaguar Agjencia për Informim dhe Privatësi, e cila ka bërë thirrje që të respektohet kuadri ligjor në fuqi në mbrojtjen e të dhënave personale që gjenden në listët e shpërndara, raporton teve1.info.
AIP, rekomandon që gjatë transmetimit të këtyre listave të shpërndara të aplikohet efekti i mjegullimit.
“Agjencia për Informim dhe Privatësi u bën thirrje subjekteve mediatike/portaleve, ashtu si edhe qytetarëve që përdorin rrjetet sociale, të respektojnë kuadrin ligjor në fuqi në mbrojtjen e të dhënave personale, që gjatë transmetimit apo njoftimit me lajmin të mos publikojnë të dhënat personale të qytetarëve që gjenden në listat e shpërndara, duke aplikuar efektet e mjegullimit”, thuhet në njoftimin e AIP-së.
Sipas AIP-së, ato lista përmbajnë kategori të të dhënave personale të qytetarëve, të cilat janë mbledhur dhe përpunuar për një qëllim specifik.
