Kryetari i Bashkimit Demokratik për Integrim (BDI), Ali Ahmeti, ka përgëzuar Shqipërinë dhe kryeministrin Edi Rama për arritjen e jashtëzakonshme të hapjes së të gjithë kapitujve negociues me Bashkimin Europian brenda vetëm 12 muajve.
Ahmeti e cilësoi këtë një “rekord mbresëlënës” dhe theksoi se e ardhmja europiane mbetet rruga e vetme për shqiptarët dhe për Ballkanin Perëndimor.
Ai nënvizoi se Maqedonia e Veriut dhe Kosova duhet të ndjekin shembullin e Shqipërisë dhe Malit të Zi në përpjekjet për integrim në BE, duke tejkaluar sfidat ekzistuese.
“Arritje e jashtëzakonshme, një bravo e madhe për Shqipërinë, bravo Edi. Vërtetë për shqiptarët, dielli lind në perendim. Shqipëria arriti që për 12 muaj të hap të gjithë kapitujt negociues të ndarë në 6 grupëkapitujsh, që në vete përbën rekord mbresëlënës. E ardhmja europiane është rruga e vetme për shqiptarët dhe për të gjithë të tjerët në Ballkanin perendimor. Maqedonia e veriut dhe Kosova duhet të ndjekin hapat dhe ti bashkangjiten përkushtimit të Shqipërisë dhe të Malit të Zi për tu integruar në Bashkimin Europian me angazhim konkret në tejkalimin e sfidave para nesh. Në këto kohëra dhe rrethana të vështira për kontinentin tonë dhe për botën, rruga jonë europiane dhe rreshtimi me Bashkimin Europian është përcaktimi më i sigurt për kombet tona dhe për rajonin”, ka shkruar ai në Facebook.
