Zëvendësministri i Punëve të Jashtme, Kreshnik Ahmeti, në lidhje direkte nga Strasburgu ka bërë të ditur se Kosova ka pasur mbështetje nga vendet e QUINT-it dhe shtetet tjera për pranimin e aplikimit në Këshillin e Evropës.
Ahmeti ka thënë se shtetet partnere kanë bërë një punë të jashtëzakonshme gjatë procesit të aplikimit në rrafshin e votave dhe në kuptimin procedural.
“Ka një numër të madh të shteteve që e mbështesin Kosovën, duke filluar nga vendet e QUINT-it, por edhe shtetet tjera të cilat nuk janë përbrenda formatit, të cilat kanë bërë një punë të jashtëzakonshme deri tash në mbështetje të aplikimit tonë, qoftë në rrafshin e votave, qoftë në kuptimin procedural. Këtu qëndrojmë shumë mirë, çdo gjë është bërë në koordinim me këto vende partnere para se të aplikojmë dhe gjatë aplikimit”, tha Ahmeti në emisionin “Ditari” në Tëvë1.
Ndërsa duke folur për fazën përfundimtare të procesit të pranimit, zëvendësministri ka thënë se Këshilli i Evropës nuk ka afate për procedurat e saj, dhe për këtë arsye nuk mund të dihet vendimi final.
“Këshilli i Evropës nuk ka afate për procedurat e saj, prandaj nuk mund të bëjmë një përllogaritje se kur do të jetë vendimi final, gjithashtu vendimi final nuk është i Asamblesë Parlamentare, vendimi i saj shkon si opinion joobligativ te Komuniteti i Ministrave, ku ministrat e Jashtëm pastaj e marrin vendimin final që të na ftojnë të bëhemi pjesë e Këshillit të Evropës”, tha ai.
Ahmeti ka thënë se duhet të fillojnë procedurat në Asamblenë Parlamentare dhe të përpilohen raportet për Kosovën.
“Ministrat takohen vetëm një herë në vit dhe në këtë vit në muajin e ardhshëm do të jetë samiti historik, ku do të takohen liderët e shteteve, që mbahet për herë të katërt në historinë e Këshillit të Evropës, përderisa në anën tjetër ende duhet të fillojë procedura në Asamblenë Parlamentare që të përpilohen raportet për Kosovën”, shtoi ai. /teve1.info/
