Në kuadër të vizitës në Oqeani, zëvendësministri i Punëve të Jashtme dhe Diasporës, Kreshnik Ahmeti, filloi vizitën në Fixhi ku u prit në takim nga kryeministri, Sitiveni Rabuka.
Ahmeti dhe Rabuka vlerësuan marrëdhëniet midis dy vendeve
Ata kanë diskutuar rreth marrëdhënieve dypalëshe, bashkëpunimin në rrafshin ndërkombëtar dhe zhvillimet e fundit botërore.
“Gjatë takimit, u diskutua për thellimin e marrëdhënieve dypalëshe, me theks të veçantë për marrëveshjen në proces lidhur me konsultimet politike”, thuhet në komunikatë.
Tutje, është bërë e ditur se lidhur me bashkëpunimin ndërkombëtar, Ahmeti, falënderoi kryeministrin Rabuka, për mbështetjen e vazhdueshme që ka dhënë Fixhi përgjatë proceseve integruese të Kosovës në organizata ndërkombëtare.
Ndërsa, sa i përket zhvillimeve të fundit botërore, u tha se është e rëndësishme që të ruhet paqja dhe stabiliteti.
“Të dyja palët vlerësuan se ndajnë të njëjtat vlera në këtë drejtim”./teve1.info/
