Asociacioni i Gazetarëve të Kosovës ka reaguar pasi sot ekipit të televizionit Kanal 10 iu është dëmtuar vetura gjatë raportimeve në veri të vendit.
Në reagimin e tyre thuhet se gazetarët janë target i vazhdueshëm i protestuesve serbë.
“Këto sulme në drejtim të gazetarëve dhe punonjësve të tjerë medialë po intensifikohen, ndërsa ata vazhdojnë të raportojnë në kushte shumë të rënda. Për AGK-në, është e papranueshme gjendja e gazetarëve, të cilët janë targeti i vazhdueshëm i protestuesve serbë. Teksa kjo rëndohet edhe më shumë, kur atyre nuk po u ofrohet mbrojtje e drejtpërdrejtë nga KFOR, dhe prezenca tjetër ndërkombëtare në atë pjesë të vendit”, thuhet në reagim.
Teksa AGK u ka bërë thirrje pronarëve të mediumeve që prioritet të kenë mirëqenien e gazetarëve, kurse të njëjtëve u është kërkuar që t’iu përmbahen instruksioneve të Policisë së Kosovës.
“AGK-ja, u bën thirrje pronarëve të mediave, kryeredaktorëve dhe organeve udhëheqëse që të kenë prioritet mirëqenien e gazetarëve, kameramanëve, fotoreporterëve dhe shoferëve. Ndërsa, kolegëve gazetarë iu bëjmë thirrje që t’iu përmbahen instruksioneve të Policisë së Kosovës”, thuhet tutje./teve1.info./