Asociacioni i Gazetarëve të Kosovës ka reaguar ashpër ndaj deklaratave të Presidentes së Kosovës, Vjosa Osmani, të bëra gjatë konferencës për media të enjten, ku ajo ka aluduar për përfshirjen e disa gazetarëve në hetime të lidhura me Milan Radojiçiqin, pa ofruar asnjë provë konkrete.
Sipas AGK-së, kjo qasje e Presidentes përbën rrezik të drejtpërdrejtë për sigurinë fizike dhe juridike të gazetarëve në Kosovë.
“Akuzat dhe insinuatat e Presidentes Osmani rrezikojnë sigurinë fizike të gazetarëve,” thuhet në reagimin zyrtar të AGK-së.
Presidentja Osmani gjatë konferencës për shtyp është shprehur se “disa gazetarë” janë përmendur në raportet e Agjencisë Kosovare të Inteligjencës (AKI), në lidhje me raste të sigurisë, duke i lidhur me Radojiçiqin dhe me atë që e ka quajtur “grusht-shtet”.
AGK e ka quajtur këtë një retorikë “thellësisht të papërgjegjshme” për një lidere shteti dhe ka paralajmëruar se ajo përbën formë të hapur të intimidimit ndaj gazetarëve.
“AGK-ja e dënon ashpër retorikën akuzuese dhe nxitëse të Presidentes Osmani gjatë konferencës për shtyp, pasi që ajo rrezikon direkt sigurinë fizike të gazetarëve,” thuhet në deklaratë.
Organizata e gazetarëve ka kërkuar po ashtu një reagim të qartë nga organet e sigurisë në vend, në lidhje me akuzat e bëra nga Presidentja, duke i cilësuar ato si shqetësuese dhe të pabazuara.
“AGK-ja fton organet e sigurisë të deklarohen për këto akuza kaq të rënda, që shërbejnë si intimidim i hapur ndaj gazetarëve, në përpjekje për të ndaluar punën e tyre për të bërë pyetje në interes të publikut.”
Në fund të reagimit, AGK ka bërë thirrje që Presidentja të tërhiqet nga praktikat që i cilëson si jodemokratike, dhe të mbrojë lirinë e medias dhe të shprehjes, siç e kërkon roli i saj kushtetues.
“AGK-ja e fton sërish Presidenten Osmani që të heqë dorë nga praktika jodemokratike e sulmeve ndaj gazetarëve dhe medieve, dhe të luajë rolin e saj kushtetues që garanton lirinë e medias dhe shprehjes.”
