Asociacioni i Gazetarëve të Kosovës ka reaguar pas publikimit të raportit të Komisionit Evropian për Kosovën, duke vlerësuar se gjetjet e tij pasqyrojnë presionet dhe vështirësitë me të cilat përballen gazetarët dhe mediat në vend.
Përmes një komunikate, AGK-ja ka theksuar se raporti evidenton mungesën e përparimit në fushën e lirisë së medias dhe shprehjes, ndërsa si shqetësim të veçantë ka veçuar gjuhën e ashpër të përdorur nga zyrtarë të lartë qeveritarë ndaj gazetarëve, përfshirë kryeministrin Albin Kurti.
Në raportin e Komisionit Evropian përmenden gjithsej 35 raste të sulmeve fizike dhe verbale, si dhe kërcënimeve ndaj gazetarëve gjatë periudhës së raportimit. Ndonëse numri paraqet rënie krahasuar me vitin paraprak, raporti evidenton edhe pengimin e punës së gazetarëve nga zyrtarët e sigurisë, akuzat dhe retorikën e ashpër të zyrtarëve të lartë ndaj mediave.
“Gjatë periudhës së raportimit janë regjistruar 35 raste të sulmeve fizike dhe verbale apo të kërcënimeve ndaj gazetarëve, një rënie e konsiderueshme krahasuar me vitin paraprak. Sulmet përfshinin pengimin e punës së gazetarëve nga zyrtarët e sigurisë, si dhe akuzat dhe gjuhën e ashpër të përdorur nga zyrtarë të lartë qeveritarë (përfshirë Kryeministrin) ndaj gazetarëve dhe mediave”, thuhet në raportin e Komisionit Evropian.
Po ashtu, në raport u bëhet thirrje zyrtarëve publikë që të përmbahen nga deklaratat që shënjestrojnë ose diskreditojnë gazetarët, ndërsa kërkohet që sulmet dhe frikësimet ndaj tyre të dënohen.
Raporti përmend edhe raste të tjera shqetësuese, përfshirë arrestimin dhe mbajtjen për një kohë të shkurtër në paraburgim të një kameramani nga Policia e Kosovës, si dhe ndalimin e së paku katër personave të dyshuar për kërcënimin e gazetarëve. Gjithashtu, evidentohen rastet e ngacmimit në internet dhe shpërndarjes së të dhënave personale të gazetarëve.
AGK-ja ka vlerësuar se raporti paraqet një pasqyrim të situatës së vështirë në të cilën zhvillohet gazetaria në Kosovë, duke kërkuar ndaljen e sulmeve dhe respektimin e punës së gazetarëve në shërbim të interesit publik.
“AGK-ja e sheh këtë raport si pasqyrim real të ambientit të rëndë të të bërit gazetari në Kosovë dhe bën sërish thirrje për ndalimin e sulmeve në drejtim të gazetarëve dhe respektimin e punës së tyre në interes të publikut”, thuhet në komunikatë.
Ndër rekomandimet kryesore të Komisionit Evropian për Kosovën janë forcimi i kapaciteteve të prokurorisë, gjyqësorit dhe organeve të zbatimit të ligjit për trajtimin e rasteve të dhunës dhe kërcënimeve ndaj gazetarëve, organizimi i trajnimeve për sigurinë e tyre dhe krijimi i mekanizmave të paralajmërimit të hershëm dhe reagimit të shpejtë.
Po ashtu, kërkohet miratimi i një ligji të ri për Komisionin e Pavarur të Mediave, në përputhje me standardet e Bashkimit Evropian, si dhe rishikimi i Ligjit për Radio Televizionin e Kosovës, me qëllim sigurimin e financimit të qëndrueshëm dhe ruajtjen e pavarësisë së transmetuesit publik.
Komisioni Evropian ka vlerësuar se rekomandimet e vitit të kaluar janë zbatuar vetëm pjesërisht dhe se shumica e tyre mbeten ende të vlefshme.
