Asociacioni i Gazetarëve të Kosovës (AGK) ka njoftuar se është liruar kameramani i portalit “Paparaci”, Jetmir Muji, i cili ishte ndaluar nga Policia e Kosovës derisa po kryente detyrën e tij.
Sipas AGK-së, Muji ishte arrestuar dhe mbajtur për disa orë në Stacionin Policor Qendër, ndërkohë që një prokuror ka urdhëruar lirimin e tij pas marrjes së një deklarate.
“Pas disa orësh të mbajtjes së jashtëligjshme në Stacionin Policor Qendër, kameramani Jetmir Muji është liruar. Pasi ka dhënë një deklaratë dhe është mbajtur pa ndonjë shpjegim, një prokuror ka urdhëruar lirimin e Mujit,” thuhet në njoftimin e AGK-së.
Asociacioni ka dënuar fuqishëm këtë veprim, duke e cilësuar si mbajtje arbitrare dhe abuzim me detyrën nga ana e pjesëtarëve të Policisë së Kosovës.
“AGK dënon fuqishëm arrestimin dhe mbajtjen arbitrare të Mujit për disa orë në Polici, dhe kërkon përgjegjësi nga ana e Policisë së Kosovës për abuzim me detyrën nga pjesëtarët e saj,” theksohet më tej.
Sipas raportimeve, kameramani ishte duke punuar për një storie rreth një shkolle private, të cilën e ndjekin edhe vajzat e presidentes Vjosa Osmani.
