Ascociacioni i Gazetarëve të Kosovës bën të ditur se dy gazetarë të medias lokale Plus Tv, janë kërcënuar me vrasje.
Sipas AGK-së, redaksia e Plus TV ka njoftuar se Fatos Hetemi dhe Irfan Maliqi kanë pranuar mesazhet kërcënuese me vrasje nga një llogari në rrjetin social Facebook, pas shkrimeve të fundit të kësaj medie lidhur me dy xhamitë në Komunën e Vitisë.
“Mesazhet kërcënuese me vrasje janë në drejtim drejtorit Fatos Hetemi dhe gazetarit Irfan Maliqi nga PlusTV…Këto kërcënime ndërlidhen me serinë e raportimeve të televizionit Plus lidhur me problemet e shqetësimet që kanë të bëjnë me xhamitë në Skifteraj dhe Ramnishtë, në këtë komunë, pasi Bashkësia Islame e Vitisë, në kuadër të BIK-ut, thotë se dy xhamitë, njëra në fshatin Skifteraj dhe tjetra në Ramnishtë, janë jashtë kontrollit dhe menaxhimit të BIK-ut dhe se frekuentohen nga njerëz të dyshimtë”, thuhet ndër të tjera në njoftimin e redaksisë, shkruan AGK.
Me këtë rast, AGK-ja ka ftuar Policinë e Kosovës që ta arrestojë personin përgjegjës për kërcënimin.
“AGK, vlerëson shumë serioz dhe të rrezikshëm kërcënimin dhe e dënon në termat më të fortë. AGK-ja, e fton Policinë e Kosovës të kujdeset për sigurinë e gazetarëve dhe stafit tjetër të televizionit dhe të punojë intensivisht për identifikimin dhe arrestimin e personit përgjegjës për kërcënimin”, thuhet në njoftim. /Teve1.info/
