Asociacioni i Gazetarëve të Kosovës ka shprehur ngushëllime për vdekjen tragjike të kameramanit Laurent Krasniqi, i cili humbi jetën në një aksident të rëndë trafiku të mërkurën mbrëma në fshatin Llukar të Prishtinës.
Në telegramin e ngushëllimit, AGK-ja ka thënë se është “thellësisht e tronditur” nga vdekja e Krasniqit, i cili për disa vjet kishte punuar si kameraman në disa media në Kosovë, përfshirë T7, TV Dukagjini dhe Tëvë1.
“Për disa vjet, Laurenti ka punuar si kameraman në disa media, duke përfshirë T7, TV Dukagjini, Tëvë1 dhe të tjera. Ai ka dhënë një kontribut të rëndësishëm në skenën mediale me punën e tij profesionale, dhe do të kujtohet për kolegialitetin e pashoq tek i gjithë komunitetit medial në vend”, thuhet në telegramin e AGK-së.
Asociacioni i Gazetarëve të Kosovës u ka shprehur ngushëllime familjes, miqve dhe të gjithë kolegëve që kanë punuar me Krasniqin.
“AGK-ja i shpreh ngushëllime të sinqerta familjes, miqve dhe të gjithë kolegëve që kanë punuar bashkë me të”, thuhet në reagim.
Krasniqi humbi jetën pas një aksidenti të rëndë që ndodhi rreth orës 20:17 në Llukar, ku një veturë u përplas me motoçikletën që drejtonte ai. Fillimisht, ai u dërgua për trajtim në Emergjencën e QKUK-së, ku mjeku konstatoi vdekjen e tij.
Sipas informacioneve të publikuara pas aksidentit, me vendim të prokurorit trupi i pajetë i Krasniqit është dërguar në Institutin e Mjekësisë Ligjore për obduksion.
Ndërkohë, shoferi i veturës së përfshirë në aksident është arrestuar dhe, me urdhër të prokurorit, është dërguar në mbajtje. Hetimet për zbardhjen e plotë të rrethanave të aksidentit janë në vijim.
