Asociacioni i Gazetarëve të Kosovës ka dënuar ashpër përcjelljen dhe kërcënimin ndaj ekipit të televizionit Tëvë1 në veri të Kosovës. Gazetari Venhar Isufi dhe kameramani Valmir Gashi kanë raportuar se janë ndjekur dhe kërcënuar nga një veturë e tipit Audi A4, ngjyrë e zezë, e cila është ndaluar para objektit të komunës së Zveçanit.
Në këtë moment, një person u ka thënë gazetarëve:
“Nëse donit foto me zyrtarin policor, G.K.,” duke iu referuar një raporti televiziv që ishte transmetuar një natë më parë për këtë zyrtar.
AGK-ja ka theksuar se individët që janë pjesë e organeve të sigurisë së Kosovës kanë përdorur metoda të papranueshme për të frikësuar gazetarët në kryerjen e punës së tyre.
“E dënojmë fuqishëm këtë sjellje dhe e vlerësojmë si një mënyrë të papranueshme të frikësimit ndaj gazetarëve që duan të bëjnë punën e tyre,” tha AGK-ja në një njoftim zyrtar.
Ekipi i Tëvë1 ka raportuar rastin në Polici, ndërsa AGK-ja ka kërkuar nga organet e rendit që të kryejnë një hetim të plotë dhe të shpejtë.
“Gazetarët duhet të jenë në gjendje të bëjnë punën e tyre të papenguar, në secilën rrethanë,” përfundon njoftimi.
Polici që dyshohet për kontrabandim dhe lidhje me BIA-n serbe kërcënon ekipin e TËVË1
