Agjencia e kundërzbulimit dhe kundërterrorizmit e Polonisë nisi të hënën një hetim mbi një zjarr që shpërtheu gjatë natës në një fabrikë që prodhonte pjesë për dronë për ushtritë polake dhe ukrainase, sipas transmetuesit TVP Ëorld.
Agjencitë thuhet se po hetojnë nëse një zjarrvënës shkaktoi zjarrin në objektin në qytetin jugor Skarzysko-Kamienna, i cili operohet nga një nga kompanitë më të mëdha private të mbrojtjes në Poloni.
Raportime të pakonfirmuara të cituara nga agjencia polake e lajmeve Onet thanë se pamjet e kamerave të sigurisë tregonin një burrë të maskuar në ambientet e fabrikës në kohën e incidentit, sipas Anadolu-t.
Firma e mbrojtjes WB Group tha se zjarri ishte “i vogël”, ndërsa një zëdhënës i qeverisë tha se incidenti po merrej “jashtëzakonisht seriozisht”.
“Zyrtarët e ABË-së (Agjencia e Sigurisë së Brendshme) po punojnë për të përcaktuar nëse kjo mund të konsiderohet një akt sabotimi apo jo”, thuhet se i tha zëdhënësi Jacek Dobrzynski transmetuesit TVN24.
Nuk raportohet për persona të lënduar gjatë zjarrit, ndërsa dëmet e shkaktuara ende po vlerësohen.
“Të gjitha procedurat dhe sistemet e sigurisë funksionuan siç duhej dhe zjarri u shua shpejt”, riafirmoi më tej WB Group.
Ai vuri në dukje se objekti do të rifillojë operacionet sapo të përfundojnë formalitetet e nevojshme.
