Media palestineze njoftoi se një vajzë e vogël vdiq dje nga uria dhe dehidratimi në Khan Younis, në Gazën jugore.
Vajza e vogël ndërroi jetë në Spitalin e Fëmijëve dhe Maternitetit për shkak të kequshqyerjes së rëndë të shkaktuar nga uria e vazhdueshme mes rrethimit të imponuar nga Izraeli në enklavë, raportoi agjencia zyrtare palestineze e lajmeve WAFA, duke cituar mjekët.
Zyrtarët mjekësorë në Gaza theksuan se mijëra fëmijët vuajnë nga simptomat e kequshqyerjes për shkak të bllokadës së rreptë të Izraelit në Gaza, e cila ka mbyllur të gjitha kalimet dhe ka bllokuar furnizimet thelbësore për gati 100 ditë, përfshirë ushqimin, ujin, ilaçet dhe karburantin.
Drejtori i ndihmës mjekësore në Gazën jugore, Bassam Zaqout tha më parë se Gaza është bërë një “vend vdekjeje”, me urinë që prek 100 për qind të popullsisë, tha agjencia.
Ministria e Shëndetësisë e Gazës tha më 28 maj se të paktën 60 fëmijë në enklavë kishin vdekur nga kequshqyerja e shkaktuar nga bllokada e vazhdueshme e Izraelit.
Izraeli ka hartuar një plan për të krijuar katër pika shpërndarjeje ndihmash në Gazën jugore dhe qendrore, të cilat mediat izraelite thonë se synojnë evakuimin e palestinezëve nga Gaza veriore në jug.
Sipas Radios Ushtarake të Izraelit, plani i shpërndarjes së ndihmave synon ta kthejë veriun e territorit në një “zonë plotësisht të shpopulluar”.
Mekanizmi u kundërshtua nga bashkësia ndërkombëtare dhe OKB-ja, e cila erdhi si një përpjekje alternative nga Izraeli për të anashkaluar shpërndarjen e ndihmës përmes kanaleve të OKB-së.
Izraeli që nga 2 marsi ka mbajtur të gjitha kalimet kufitare të mbyllura, duke ndërprerë hyrjen e ushqimit, ilaçeve, karburantit dhe furnizimeve të tjera thelbësore për 2.4 milionë banorë të Gazës.
Ushtria izraelite, duke hedhur poshtë thirrjet ndërkombëtare për armëpushim, ka ndjekur një ofensivë brutale kundër Gazës që nga tetori 2023, duke vrarë gati 55.000 palestinezë, shumica prej tyre gra dhe fëmijë.
