Sekretari i Përgjithshëm i NATO-s, Mark Rutte, tha të enjten se agjencia e prokurimit e organizatës po bashkëpunon me policinë që heton akuzat për korrupsion dhe mashtrim që përfshijnë blerjen e pajisjeve ushtarake.
Agjencia e Mbështetjes dhe Prokurimit të NATO-s (NSPA) ndihmon 32 anëtarët e aleancës më të madhe të sigurisë në botë dhe partnerët e tyre të blejnë pajisje mbrojtëse dhe sisteme të tjera sigurie dhe mbështetje. NATO si organizatë nuk zotëron asnjë armë.
Agjencia e drejtësisë penale e Bashkimit Evropian, Eurojust, tha të enjten se kishte ofruar mbështetje për një hetim ndërkufitar mbi korrupsionin e dyshuar që përfshinte punonjës aktualë dhe ish-punonjës të NSPA-së. Hetimi shtrihet në Spanjë dhe Luksemburg, ku ndodhet selia e NSPA-së.
Prokurorët dyshojnë se punonjësit e agjencisë mund t’u kenë dhënë informacione konfidenciale kompanive për t’i ndihmuar ato të fitonin kontrata dhe se paratë mund të jenë pastruar përmes firmave konsulence të krijuara për këtë qëllim, ka raportuar AP.
Rutte tha se agjencia e NATO-s po “punon shumë ngushtë me të gjitha autoritetet përkatëse dhe padyshim që ne do të vazhdojmë ta bëjmë këtë. Ne duam të shkojmë në rrënjë të kësaj.” Ai foli në Turqi ku kryesoi një takim të ministrave të jashtëm të NATO-s.
