Agjencia e Kosovës për Akreditim (AKA) është pranuar si anëtare me të drejta të plota në Regjistrin Evropian për Sigurimin e Cilësisë në Arsimin e Lartë (EQAR), pas një vlerësimi pozitiv nga ekspertët e pavarur të Asociacionit Evropian për Sigurimin e Cilësisë (ENQA).
Lajmin e ka bërë të ditur drejtori ekzekutiv i AKA-së, Naim Gashi, përmes një postimi në rrjete sociale. Ai ka publikuar letrën zyrtare nga Presidenti i EQAR-it, Stéphane Lauwick, në të cilën konfirmohet pranimi dhe vlefshmëria e anëtarësimit deri më 31 dhjetor 2029.
Në letrën dërguar Gashit, thuhet:
“Aplikimi juaj është aprovuar dhe përfshirja juaj do të jetë e vlefshme deri më 31.12.2029. Ju lutem pranoni urimet e mia për aplikimin tuaj të suksesshëm dhe përgëzimet e mia të përzemërta për punën tuaj, në emër të të gjithë anëtarëve të Komitetit të Regjistrit.”
Pranimi në EQAR përfaqëson një arritje të rëndësishme për sistemin e arsimit të lartë në Kosovë dhe rikthen AKA-në në hartën evropiane të agjencive të njohura për cilësinë e arsimit.
Për këtë zhvillim ka reaguar edhe ministri i Arsimit, Arbërie Nagavci, e cila përmes një postimi në Facebook ka theksuar se ky është një tregues i qartë i përkushtimit institucional për një sistem arsimor cilësor dhe të harmonizuar me standardet ndërkombëtare.
“Kjo është dëshmi e qartë e përkushtimit tonë për një sistem arsimor transparent, cilësor dhe të harmonizuar me praktikat më të mira ndërkombëtare,” ka shkruar Nagavci.
