Ferid Agani, kandidat për deputet nga radhët e Partisë së Drejtësisë (PD), e cila në këto zgjedhje është bashkuar me Lidhjen Demokratike të Kosovës (LDK), ka folur për raportet mes partive politike dhe situatën politike në vend, në emisionin “Mesditë” në Tëvë1.
Agani ka vlerësuar se zgjedhjet e reja duhet të shënojnë edhe një realitet të ri politik në Kosovë, duke i konsideruar ato si mundësi për reflektim dhe ndryshim të qasjes politike.
“Unë mendoj dhe shpresoj se është një situatë e re politike. Është një mundësi e re për çdo parti politike që të dalë ndryshe, por edhe për çdo qytetar që ta analizojë periudhën e kaluar, të nxjerrë mësime nga ata që kanë reflektuar dhe nga ata që vazhdojnë me qasjet e vjetra”, ka thënë Agani.
Ai ka theksuar se niveli më i lartë i përgjegjësisë që mund të tregojnë partitë politike është gatishmëria për dialog dhe bashkëpunim, pa hezitim dhe pa ngarkesa nga e kaluara.
“Shkalla më e lartë e përgjegjësisë që mund të tregojnë partitë politike është të ulen në tavolinë për të biseduar me partnerët e tyre politikë, duke e lënë të kaluarën pas. Nuk jetohet në të kaluarën, por në të tashmen”, është shprehur ai.
Duke iu referuar momenteve historike të bashkimit politik, Agani ka kujtuar periudhat më kritike për shtetin e Kosovës, përfshirë Konferencën e Rambujesë dhe atë të Parisit, ku sipas tij uniteti politik ka qenë vendimtar.
“Në momentet më kritike të politikës për shtetin, si në periudhën e Rambujesë dhe të Konferencës së Parisit, ka ndodhur bashkimi. Shpresoj që një bashkim i tillë të ndodhë edhe sot, sepse në këtë periudhë të zhvillimeve të mëdha gjeopolitike, Kosova dhe subjektet politike duhet të jenë të bashkuara”, ka deklaruar Agani.
Në fund, ai ka theksuar se dialogu politik mund të sjellë edhe përplasje mendimesh, por rëndësi ka që komunikimi dhe bashkëpunimi të vazhdojnë.
“Edhe në tryezë mund të lindin konflikte dhe të thuhen fjalë të rënda, por është e rëndësishme që ato të mbesin aty dhe të vazhdojë bashkëpunimi”, ka përfunduar Agani.
