Kryetari i Partisë së Drejtësisë, Ferid Agani, ka deklaruar se Lidhja Demokratike e Kosovës e ka ftuar PD-në për bashkëpunim jo vetëm në zgjedhjet aktuale, por edhe në ato të 9 shkurtit. Këto komente i bëri në emisionin “Këndi i debatit” në Tëvë1.
Agani tha se ftesa e LDK-së për zgjedhjet e tanishme ka qenë e drejtpërdrejtë dhe politike.
“Ftesa që i është drejtuar Partisë së Drejtësisë nga kryetari i LDK-së ishte një ftesë politike. Kryetari i LDK-së e ka ftuar PD-në për t’u bashkuar në garën politike dhe ne e kemi pranuar”, tha ai.
Ai zbuloi se një ftesë e ngjashme ishte bërë edhe në zgjedhjet e 9 shkurtit, por atëherë ai kishte vendosur ta refuzonte.
“Me ju thënë të drejtën, LDK-ja i ka bërë ftesë PD-së në zgjedhjet e 9 shkurtit – ftesë personale nga kryetari i LDK-së – por unë atë ftesë e kam refuzuar sepse kam dashur të formuloj ‘Koalicionin për Familje’. Këtë e kam sqaruar edhe me kryetarin e LDK-së”, deklaroi Agani.
Agani theksoi se në situatën aktuale politike, bashkëpunimi me LDK-në është vendim i qëllimshëm dhe i koordinuar.
